上海野狐禅语《上海人家格钢种镬子》

来源 I 文字志愿者：赵国强

“钢种镬（huo）子是啥物（me）事啊？”有一趟我格四十岁格囡儿问我。“钢种镬子就是铝制品格烧饭锅子。”我塌伊讲：“老早仔阿拉小辰光拿铝制品格烧饭锅子侪叫钢种镬子，标准一点格讲法叫钢精锅子。”

上海1843年开埠以后，英国人格洋行从广州来上海抢滩，带来了一批广东人买办、广东人帮佣。清政府允许华洋杂居以后，广东人最先进入租界。所以进入上海租界最早格华人应该是是广东人，所以上海租界里厢最早流行讲格上海闲话是以广东闲话为主，所以后来格上海闲话里厢有交关广东闲话格“遗迹”。老早仔上海闲话里厢讲格“镬子”就是来自于广东闲话，广东闲话里厢现在还是拿锅子叫“镬子（ho zei）”。老上海人拿炒菜格锅子叫“炒菜镬子”，拿烧饭格镬子叫“饭镬子”，还有镬盖、镬铲、镬焦等等叫法。最气人格是上海人还拿扁瘪面孔叫“踏瘪塌格钢种镬子”。

上海人现在叫格锅子，广东人叫镬子，到了台湾人格嘴巴里就叫“鼎”了。台湾有名格“大鼎肉羹”格“鼎”，就是指一种有手柄格圆底锅，是用来炒菜呃，一边炒一边抖一边翻，猛火快炒，一股诱人格“镬气”扑鼻而来，馋煞侬！

据讲，历史浪厢最早格锅、镬和鼎侪是一样呃，侪是三足鼎立呃，以便于下头生火烹煮食物。后来古人一点点聪明，就用“行（hang）灶”了；再后来辣拉屋里厢用格炉灶一点点行起来了，搿样仔慢慢交三足萎缩塌就出现了“镬子”，还有保持三足格仍旧叫“鼎”。所以古书有曰：“有足曰鼎，无足曰镬。”“鼎大而无足曰镬”。古代格镬子，除了用来烹煮食物以外，还用来烹煮犯人，搿种叫“镬烹”格酷刑后来被废除了。