上海洋泾浜闲话——《上海闲话搭日本闲话》专辑

来源 I 文字志愿者：赵国强

前   言

搿（ge）个几年来，勿怪是辣拉日（nie）里还是辣拉夜到，侬只要打开电视机，格到电视剧频道，十有八九侪（chai）是“抗日神剧”，甚至是“抗日闹剧”。从阿拉小辰光（上个世纪五十年代）就辣拉电影里厢开始听惯格“八嘎野鹿”、“米西米西”、“你地死啦死啦地”，弄到现在还是搿个老腔调，只不过辣拉现在格电视剧里厢多了一点大段大段格日本东洋闲话，以示情节“高雅”。

上海人侪晓得，上海洋泾浜闲（ai）话来自于英语。其实有一点上海洋泾浜闲话也来自于法语、俄语、德语或者意大利语，当然也包括来自于日本东洋闲话。古话讲“习惯成自然”，由于老上海人从小听惯了上海洋泾浜闲话，老多老上海人可能根本也弄勿清爽啥个上海闲话是“洋”泾浜闲话，啥个闲话是“土”泾浜闲话。记得辣拉上海著名格滑稽戏《七十二家房客》里厢，一个亭子间白相人阿嫂辣拉天井里一面翘起小指头嗲兮兮格吃香瓜子，一面随口“呸”、“呸”格吐瓜子壳，一面又抬起头朝二楼前客堂嗲声嗲气格喊：“王革里啊，有人寻侬喔！”。辣拉老早仔旧社会，上海小市民欢喜拿成年男性称“革里”，王姓男子是“王革里”；张姓男子就是“张革里”。1949年解放以后一段辰光也有人搿样子喊呃，大概是辣拉“文革时期”侪拿“革里”革塌了。搿个“革里”，其实就是来自日本东洋格闲话。辣拉日本闲话里厢，称男性格“彼（他）”，就叫“ ka re”（日语拼音“黑本式罗马音”），老上海人拿伊批发过来，变成了上海洋泾浜闲话，大多数新上海人或者年轻一点格老上海人大概是“不明其妙”呃。

当然，由于日本汉字主要核心部分来自于中国汉字，日本汉字格音读又受制语中国古代汉语格汉、唐、宋朝读音以及中国江南地区吴音（现代以上海闲话为主格吴语），葛落到底是上海洋泾浜闲话里厢有日本闲话，还是日本洋泾浜闲话里厢有上海闲话（吴语），专业格方言专家也是有争议呃。不过我可以辣拉搿搭帮大家捋一捋日本汉字格来龙去脉，趣谈一点上海洋泾浜日本闲话，拨（be）大家解解厌气。

（一）日本文字溯源

 中国人侪晓得，日本东洋人辣拉古代格辰光是只有闲话无没文字呃。后来日本东洋人奉行“拿来主义”，拿中国人现成格汉字拿过去当伊拉格文字去用，省力倒是省力呃。日本东洋人开始拿中国汉字拿过去格辰光，大概是辣拉中国历史浪厢一千多年以前格魏晋南北朝时期前后。当时大概日本东洋人想改革开放，搭中国接轨，派了大批格文化使者，如“遣隋使”、“遣唐使”等等来到中国来，学习中国先进格文化。伊格辰光，伊拉拿中国汉字拿过去格辰光，中国汉字里厢字格意思、观念，假使搭伊拉日本闲话对得上呃，伊拉就用日本闲话读。假使搭伊拉日本闲话对勿上呃，伊拉就用中国格“汉音（汉朝格读音）”，或者是“唐音（唐朝格读音）”来读，或者是用“吴音”来读。所谓“吴音”，就是伊格辰光苏州地区闲话格闲话。因为一千多年以前日本东洋人“西渡”到中国来，大多数是从伊格辰光中国江南苏州地区登陆上岸呃（也有一种讲法讲，南音是从朝鲜半岛传入日本呃）。直至后来日本东洋人格日本文字“片假名”，基本上就是用“吴音”来读呃。所以日本东洋人读起来格中国汉字，也勿是现在个个中国人侪听得懂呃，首先要问问侬，侬中国古代汉语格基础哪能？中国汉字格汉朝读音、唐朝读音宋朝读音侬侪听得懂伐（va）？还有，现在祖籍是上海地区以外格国人，听得懂现在以上海闲话为主格“吴语（吴音）”方言伐？

现代格日本东洋人拿伊拉用格中国汉字法定规范为一千九百四十五个，实际浪厢伊拉用了中国汉字大概有搭二千多个。